Алматыда атмосфералық ауаны қорғау қағидаларын іске асыру мәселесі бойынша кезекті ақпараттық-түсіндіру кездесуі өтті.

Талқылауға «Eco Almaty» ЖШС, «Атамекен» ҰКП Алматы қалалық кәсіпкерлер палатасы, Алматы жолаушылар тасымалдаушылары қауымдастығы, таксопарктер, техникалық байқау операторлары және бейінді мемлекеттік органдардың өкілдері қатысты.

Кездесу барысында қатысушыларға атмосфералық ауаны қорғау қағидаларының негізгі талаптары, көлік құралдарын техникалық тексеруден өткізу тәртібі, нақты шығарындыларды бақылау, катализаторды сақтау талаптары, сондай-ақ төмен эмиссиялы аймақтың (LEZ) пилоттық жобасын іске асыру жайы түсіндірілді.

Кездесуде автокөлік Алматыдағы атмосфералық ауаның ластануының негізгі көзі болып қала беретіні атап өтілді. Оның үлесіне барлық шығарындылардың шамамен 60%-ы тиесілі. Осыған байланысты көліктен шығатын зиянды заттар көлемін азайтуға және оның экологиялық жағдайын объективті бақылауды қамтамасыз етуге ерекше назар аударылуда.

Тараптар сондай-ақ жаңа экологиялық талаптарды іске асырудың практикалық тетіктерін және көлік саласын оларды кезең-кезеңімен енгізуге дайындау мәселелерін талқылады.